政情:社民連強攻立會三席

經過大分裂後,社民連喺立法會嘅勢力大減,昔日議會三席、即「社民連三子」黃毓民、陳偉業同「長毛」梁國雄,家吓只得長毛一席,重新上路嘅社民連計劃二○一二年選舉時收復失地,除咗黨主席陶君行可能續戰九龍東外,更密斟已退黨嘅前副主席勞永樂回巢,理想戰區係港島。若陶、勞均能順利入局,計埋喺新東幾乎贏硬嘅「長毛」,就會攞番三席。不過,如意算盤能否打響,都要視乎可否成功氹掂喺港島扎根多年嘅「阿牛」曾健成讓路!

阿陶選九東唔輸得

阿陶喺九龍東揼石仔多年,地區工作紮實,但卻遲遲未能涉足立法會。有社民連中人謂,如今黃、陶分家,阿陶喺下屆立法會選舉能否跑出,關乎成個黨嘅面子同未來發展嘅問題,形容呢仗「唔輸得」。據了解,社民連已派出大量喺黨內被睇高一線嘅精英出選九東,希望佢哋即使未能成功當選,亦能為阿陶抬轎;而九東下屆將加一席,又咁啱遇上白鴿黨李華明計劃退休、公民袋梁家傑有機棄守該區轉戰「超級區會」,喺兩大黨同時換人嘅「天時地利人和」下,社民連中人都期望阿陶今次可以一雪前恥。

社民連上屆喺新東、九東同九西都成功攞到一席,唯獨喺港島鎩羽而歸,主要係因為當時喺出選前退出社民連嘅勞永樂同阿牛互撼,致兩敗俱傷。勞、牛二人上屆分別攞到二萬幾同萬幾票,票數並唔低,故只要佢哋其中一人願意讓步退選,社民連下屆要喺港島攞到一席並非不可能。雖然勞醫生仲未返黨,但聽阿牛口風就唔覺佢會讓步嘞。阿牛同我哋講,當日勞醫生係「傷住個黨咁走」,認為佢「走出去就無謂返嚟」、「要還番黨一個公道」。至於佢會唔會繼續出選港島或者讓路畀對方選,佢就話係另一回事喎。

另外,聽聞社民連分裂餘波未了,依家三個副主席中嘅兩位將分道揚鑣,內務副主席王學今計劃辭職轉投人民力量,外務副主席鄧徐中則會繼續留守。 

「Money18免費即秒股票報價網站」現推出8升級功能,財經資訊,實時實發!