添煩添亂爭拗多 最低工資點收科

最低工資甩皮甩骨，指引唔清唔楚，勞資雙方都唔肯收貨。港府卸膊卸出個大頭佛，後欄着火焦頭爛額。

吓，勞工處處長卓永興尋日居然大言不慚，話最低工資條例實施係保障工人權益嘅里程碑，但勞資雙方「需要時間適應」，好明顯係心虛啦。佢又拍心口話，如果落實過程有疑問，可以向勞工處求助喎。

求助？港府唔添煩添亂已經當幫忙啦。嗱，最低工資五月一日實施，依家仲爭拗不斷。第二樣唔講，淨係飯鐘錢同休息日計薪問題已經搞到一鑊泡。由於指引唔清晰，保障勞工權益嘅最低工資條例居然容許無良僱主削減福利，打工仔實際收入隨時原地踏步。

呢，又有家居用品連鎖店員工踢爆，公司將時薪調高到廿八蚊後，將飯鐘改為無薪，勤工獎又被扣減，員工根本冇實際得益，只能夠眼白白咁睇住原有福利被剝奪，你話咁嘅政策係咪荒謬吖？叮！

打工仔未見其利先受其害，做老闆嘅同樣一殼眼淚，本港一家網吧集團負責人批評話，勞工處一直冇提及飯鐘同休息日計薪問題，感覺畀當局出賣咗。由於最低工資、租金及政府發牌規管，估計業內未來一年有三分之一網吧要關門大吉。

當局制訂政策粗疏甩漏，事前未經深思熟慮，事後發出嘅指引又冇列明飯鐘同休息日係咪有薪，令人無所適從。有餐飲業僱主組織負責人話，本港九成食肆屬中小企，如果將飯鐘及休息日計算薪酬，薪酬開支會飆升四成以上。

港府懶得就懶，條例有漏洞唔修補；僱主慳得就慳，利用法律罅賺到盡。繼早排僱主聯合會建議，運用法律漏洞減低實際要畀嘅最低工資後，再有中小型企業聯合會連同廿幾間保安公司僱主準備登全版廣告，建議將休息日列作無薪處理。最低工資搞到勞資關係愈來愈僵，當局直頭靠害。叮！

最低工資爭拗不斷，港府終於知衰，弊在補鑊都補到一鑊泡。勞工處針對九個特定行業推出嘅行業指引，至今只有三份出台，仲有三分之二未搞掂。卓永興見交唔到功課，死死地氣道歉，承認部分行業指引可能要最低工資實施之後至出台。

添煩添亂爭拗多，最低工資點收科？唔少行業嘅僱主見當局歎慢板，搶先一步修訂聘用條件，打工仔因為冇指引做談判籌碼，被迫接受剝削。計太一叮話齋，遇着個咁無能嘅政府，打工仔都算冇運行咯。叮！