太陽民調：核危機事後公布遲早爆鑊

日本核輻射上月底殺到香港，但本港天文台最初涉隱瞞事件，延誤最少一日才公布。環保組織批評港府警覺性不足，一味呼籲市民放心，企圖淡化危機；時事評論員則指當局沒有與時並進，對日漸嚴重的日本核危機仍停留事後公布的做法，促當局研究預警機制，讓市民防患於未然。

綠色和平項目主任古偉牧批評港府應變核危機警覺性不足，「一味匯報現時或過去嘅情況，叫市民唔使驚；點解唔學其他地方咁發預警，或者教大家遇上緊急情況點樣疏散」。

大核涉瞞事故有前科

古又擔心，大亞灣核電站涉多次隱瞞事故，港府現時又欠缺權威的核電專家，「大安旨意」依靠電廠主動申報，根本沒有能力監察電廠的運作，「最驚係市民都信政府以為冇嘢，將危機淡化」。

時事評論員王永平則批評天文台檢測空氣核輻射水平機制，沒有就最新情況與時並進，仍停留「事後公布」階段，未能做到防患未然，「好似打風咁都有預測，冇理由打完風先話番畀人知係十號風球」！

過兩三日先講無意思

王補充說，日本核輻射危機事態發展未完，當局應研究輻射污染預警機制的可行性，「過咗兩、三日先話畀市民知輻射水平高咗係無意思。如果唔好彩檢測結果係對市民健康構成威脅，市民都吸咗幾日，到時官員都唔知點交代」！

立法會議員涂謹申認為，天文台拖延公布本港空氣輻射含量做法不恰當，「好彩數據唔係好高，否則就大件事」！他促請每當有重大事故，港府應盡快公布內容，「每次只係派定心丸，市民好難有信心」。