政情：洪為民擦日本菜冇有怕
菁英會常務副主席Witman洪為民擔任互聯網專業協會副會長多年，不時向政府提出IT建議，早前相約該會常務理事陳家豪同理事陳龍盛大擦日本菜，交流IT心得，仲揀喺灣仔一間上樓日式料理聚頭，原來佢同餐廳老闆娘Reyonna係老友。
坐低之後，Witman照樣柯打新鮮魚生拼盤，有三文魚腩、油甘魚、加拿大海膽、北海道帶子，仲有鐵板燒越南虎蝦同沖繩苦瓜等。呢排係人聽見日本食品就耍手擰頭，但佢就大啖大啖咁食，懶理輻射。
近日魚生掀恐慌，佢話日本食肆相當無辜，事關唔少日菜食材早已喺地震前運抵香港，存放喺凍倉內，部分魚生亦非嚟自日本，叫大家唔使太驚青，放膽食啦！
洪為民（左二）唔怕輻射，搵埋老友陳龍盛（左一）、陳家豪（左三）齊歎魚生，日本料理嘅老闆娘Reyonna（右一）陪佢哋食埋一份。
美味魚生當前，點捨得唔食？
嚟自北海道嘅帶子，鮮甜爽口。