政情：搞搞政：德成局長搞假草場敷衍足運

仲記得香港足球代表隊喺東亞運攞咗金牌之後，民政事務局局長曾德成隨即話會大力發展足球運動，而佢尋日接受政府新聞處訪問時，隻字唔提興建全新嘅真草足球場，咁即係冇照顧到香港隊同職業球隊啫！似乎有啲自打嘴巴喎！

德成局長喺訪問中只係主動提到未來會致力發展第三代仿真草足球場，仲會將香港嘅仿真草足球場由十五個增加到三十六個，滿足市民嘅需要。沙田足球隊班主兼立法會議員林大輝話，仿真草絕對唔可以取代真草，除非全世界正規賽事都統一晒踢仿真草啦，否則喺仿真草踢到曉飛都冇用，一落真草隨時適應唔到，而且對職業球員嚟講，踢真草嘅感覺始終唔一樣。

浸會大學浸大體育系副教授雷雄德亦話，以「普及化」嚟講，大量起仿真草場總算好事，但如果從「職業化」角度去考慮，冇番多啲真草場認真唔似樣。總而言之，兩位專家嘅意見都係「有好過冇」。政府成日話鼓勵職業足運，睇嚟都係得把口。