政情：蔡關穎琴如願搞公民教育

政府日前公布新一批公民事務委員會成員名單，福布斯富豪兼中華總商會會長蔡冠深太太蔡關穎琴榜上有名。蔡太曾任香港女律師協會會長，幹勁十足，出任公職唔係首次，不過等到今年，佢終於如願以償。

獲委入公民教育委員會，蔡太開心過中獎。佢話政府一直有畀紙佢填，問佢鍾意出任乜公職，每次佢都填「公民教育委員會」，偏偏政府冇揀佢，反而派佢做同法律、訴訟有關嘅委員會，好似房屋局上訴委員會等。

直至近年，佢主動同高官表明心迹，意志咁堅決，政府都畀佢打動。到底佢心中有乜鴻圖大計？佢話有感港人只重視公民福利，對公民義務同責任唔多理解，嚟緊希望加把勁，提升公民教育水平。

蔡太口中所指嘅公民責任，唔係投票咁簡單，而係關心弱勢社群，做事為社會大局着想喎。佢當年做香港女律師協會會長時，曾發起搞《基本法》填詞比賽，有辦你睇，唔係得個講字o架。