政情：田少出海傷指撞親頭

富貴黨榮譽主席兼旅遊發展局主席田北俊鍾意坐遊艇出海，點知早幾日招待國家旅遊局官員上船，竟然遇上大風浪，田少成個人被拋到半空再跌落地受傷，左手拇指骨折，仲撞親個頭，一度失去知覺，醒番之後有一段記憶冇咗。尋日佢入馬場都戴住黑超，原因係佢睇嘢見到疊影，乜都矇查查。

尋日佢囝囝車佢去馬場，為愛駒「風雲武士」打氣，入場之後就由黨友張宇人扶佢落沙圈睇馬，暫時做住佢嘅盲公竹。田少話嗰次撞擊引致嘅只係腦部輕微水腫，醫生話抖番一個禮拜就冇晒事㗎嘞，視野亦會清晰番。至於左手拇指骨折，就要紮住紗布一段時間，急都急唔嚟。

「Money18免費即秒股票報價網站」現推出8升級功能，財經資訊，實時實發！

田少左拇指骨折，要紮紗布一段時間。