最低工資搞到一鑊粥，勞工處處長卓永興近排為飯鐘錢同休息日冇薪嘅問題四出解畫，但係啲答案全部都模棱兩可，令工會同工友都好唔滿意。
話說卓永興尋日出席工人節活動，全程閃閃縮縮避開記者追問，巡完一圈後，記者一擁而上，點知卓永興即時速逃，仲大聲問門口喺邊？佢最後當然安然離開啦，點知佢助手事後打畀現場職員，話卓永興唔見咗部電話，問有冇人執到？工作人員聽到都愛莫能助，因為現場人多混亂，搵番機會好微。哈，唔知卓永興部機有冇加密呢？否則搞到高官電話大外洩，到時都唔知點收科。