政情：踩過界撐龕場肥仔明辣慶黨友

白鴿黨立法會黨團召集人「肥仔明」李華明早前為未合規格嘅骨灰龕場宣傳慈善活動惹嚟非議，畀人質疑收受利益，前日仲有人去肥仔明辦事處踩場以示不滿，黨友黃成智高調出面幫肥仔明道歉，但未獲接納，睇嚟白鴿黨又內訌嘞！

早前有團體申請改建葵青工廠大廈做龕堂，旋即被全葵青區議會聯手反對，可見當區居民對龕堂極反感。喺葵青扎根嘅白鴿黨立法會議員「高達」李永達承認，知道肥仔明同當區兄弟喺骨灰龕問題上立場未必一致，所以早喺上個月初已經拉線，約肥仔明同班兄弟詳細咁交換意見，但估唔到肥仔明轉個頭就幫龕場做宣傳，搞出個大頭佛，令班兄弟扯晒火。

有與會者透露，席間唔少人都收到該龕堂嘅邀請，但個個都拒絕出席，肥仔明亦完全冇透露會去，所以大家一睇到報紙見佢出席活動都好愕然，覺得畀佢出賣咗，感到極度不滿，即時向高達投訴。高達話事後有同肥仔明通電話反映，但問題係依家黨內未就骨灰龕問題有統一立場。

跨部組開會難有速效

但高達同黨主席鐵頭仁商討後，決定盡快搞個跨支部研討會，政策研究相關嘅人員、受影響嘅區議員同黨中央齊齊坐低，傾吓遇到同類型問題可以點解決，免得喺年底區議會選舉前，出現地區支部同黨中央溝通不良嘅問題。

班兄弟咁扯火，都係因為肥仔明咁做擺明係打對台，擔心啲街坊覺得佢哋出爾反爾，即係送子彈畀選舉對手炮轟，影響區選，所以想將肥仔明彈得愈遠愈好，費事陀衰家。

有白鴿仔建議，骨灰龕等問題錯綜複雜，就算跨部組開會，一時三刻都唔會有乜結論，希望再有人出席任何惹火活動之前，可以考慮吓當區兄弟感受，先同佢哋交換意見，唔使好似今次咁大鑊喎！