輻射數據也隱報　監管核電信唔過

嘟、嘟、嘟……天文台天氣報告：一股不滿港府處理日本核輻射不力嘅民怨風暴，正吹襲香港，估計怨氣濃度高達一億貝可，超出安全標準一千萬倍，港府高層除「盲搶鹽」自保外，已下令本台台長李本瀅盡快提交災情評估報告。而李台長回應話，災情百年一遇，數據覆檢需時，但請各位上司放心，就算民怨輻射塵掩至，大難臨頭，佢三日後定必呈上報告。

叮！以上只係笑話一則，之但係，日本核輻射塵攻港，就唔講得笑喇，偏偏天文台喺呢個全港最關注嘅問題上，竟然鬧出隱報鬧劇，簡直豈有此理。港人誤信天文台，以為核輻射塵仲未吹到，查實自上周六起，輻射物碘131早已殺到香港，天文台秘而不宣，直到本周二先至公布，全港市民蒙在鼓裏，唔嬲就假。

呢個天文台，以前錯估颱風走向、亂發暴雨警告訊號，玩到市民陀陀轉，餐餐都死撐唔認錯，今次被指隱瞞發現輻射物，一樣死雞撐飯蓋。李本瀅尋日狡辯，由於未能百分百確定係輻射物，希望「睇清楚啲」先至公布喎；佢又話，今後會省卻覆檢程序，由抽取樣本至公布結果，兩日內完成。叮！咁講即係默認至少延遲咗一日公布啦。

其實，天文台延報輻射物數據，無論乜嘢原因，都係失職。更何況，天文台獻醜人前，依家市民仲擔心呀，連內陸廣西都一早探測到輻射物啦，香港竟然要等兩、三日先至確認，萬一輻射物濃度真係危及人體健康，香港人如何避禍？

與碘同眠，餐(金不)飲銫，諗起都得人驚。唔好話三日，三小時都隨時惹禍。呢三日「空窗期」，究竟係由於天文台設備落後？人才不足？定係官僚心態所致？當局必須找出漏洞堵塞改善，依家講緊核危機、港人健康，唔係同你講笑㗎。

天文台抵鬧，食物及衞生局局長周一嶽更加抵叮，佢話本港錄到嘅輻射量微乎其微，唔影響健康，叫市民毋須杞人憂天喎。喂，市民依家最擔憂嘅，唔止輻射塵，仲有庸官嘅防災表現呀，檢測粗疏，掉以輕心，數據延報，瞞得就瞞，有咁嘅政府，市民唔驚就假。

呢，立法會尋日辯論核危機，有議員建議擱置增加核能發電，太一叮舉腳贊成㗎，就算唔關閉大亞灣核電廠，至少都要取消增加核能供電比例啦。唔係咩？港府連輻射數據都想隱瞞，叫佢哋監管核電廠安全，咪仲難過叫天文台向市民認錯，好靠唔住啫，叮！