政情：梁高美懿高咗又瘦咗？
揭開今年恒生嘅年報，可能會覺得非常有動感，因為佢哋搵咗一班香港嘅精英運動員做模特兒，參與拍攝封面同內頁圖片，但要數最醒神嘅，莫過於副董事長兼行政總裁梁高美懿，事關佢張相真係索咗好多！
先旨聲明，唔係話梁太真人唔及上鏡，而係眾所周知佢屬於「細細粒」類型，但喺年報張相佢明顯高挑咗。雖然幅相應該經過電腦加工，但估計可能為咗遷就本年報嘅長度，所以喺合成背景時，拉長咗佢張相，連帶面形同髮型都有啲唔同咗。
至於班精英運動員，就有乒乓球嘅李靜、單車嘅黃蘊瑤、壁球嘅趙詠賢等。恒生覺得佢哋不屈不撓嘅意志同埋追求卓越嘅決心令人動容，同恒生精益求精嘅精神好相似咁話。所以梁太都喺年報講，恒生要向更高嘅業務目標挑戰，成為大中華區領先嘅商業銀行！
梁高美懿喺恒生年報張相顯得佢高挑咗。