政情：搞搞政：公院立立亂肥胡無話兒

公立醫院嘅問題連環爆，先係屯門醫院內科醫生因工作量爆煲，搞到雞飛狗走，公立醫院婦產科醫生流失原來仲嚴重，皆因大批內地孕婦嚟香港，喺私家醫院生仔，私營市場一片好景，紛紛出去搵錢，留喺公立醫院嘅婦產科醫生要照顧本地同內地孕婦，做到嗌晒救命，要求限制內地孕婦來港。究竟點拆彈？當然要問醫管局高層啦！

大批記者尋日去到醫管局守候，睇吓醫管局主席「肥胡」胡定旭同行政總裁PY梁栢賢會唔會為公立醫院帶嚟好消息，醫管局公關仲搬埋咪兜預備傳媒訪問添！

擺出咁嘅格局，初時以為會有料到喇啩，點知最後都係食白果，事關肥胡同PY都封嘴唔講。及後追問有關內地孕婦嘅問題時，肥胡更攤開雙手，擺出一副無話可說嘅樣，淨係拋低一句，叫記者問番局長。

點解肥胡無話兒？好簡單啫！呢啲咁棘手嘅問題，唔係醫管局獨力可以解決，肥胡都深知要慎言，倒不如將個波交番畀政府，費事講多錯多，惹火上身啦！