政情：鼠王芬李慧琼補鑊抽水

為咗抗議來往紅磡到中環同灣仔嘅小輪航線冇錢賺搞到要停航，四名白鴿黨黨員尋日喺紅磡碼頭玩跳海，要求政府資助承辦商，等佢哋可以繼續做落去。一跳激起千重浪，仲觸動埋兩個立法會九龍西直選女議員嘅神經，佢哋尋日即時補鑊，今日搞活動抽水。

嗰兩個女議員分別係專業會議嘅「鼠王芬」梁美芬同建仔嘅李慧琼，白鴿黨尋日跳海後上晒電視，唔知兩個女將係咪見到咁覺得蝕底，傍晚分別發採訪通知，鼠王芬朝早會喺碼頭搞告別儀式，傍晚就拉多兩個立法會議員同傳媒一齊搭船，話研究點樣重開航線喎。

至於李慧琼就仲有趣，夜晚喺紅磡碼頭簽心意卡，然後搭船來回中環同紅磡，之後仲會送卡畀碼頭職員。兩位嘅行動雖然係後知後覺兼慢人一步，但總好過乜都唔做，若果佢哋唔怕畀人寸抄橋，有樣學樣跳海嘅話，效果一定更震撼，或者吸到唔少票㗎！