政情：邱騰華唔跟電視讀鈈字
前日喺日本福島核電站附近嘅土壤搵到毒性極高嘅輻射物質「鈈」元素，洩漏核輻射嘅情況愈見嚴重，但應該最熟悉相關議題嘅環境局局長邱騰華尋日喺立法會會議上，竟然連「鈈」都讀錯。
其實「鈈」元素有兩個譯音，其一係內地譯法，即係香港電子傳媒日日用嘅，有邊讀邊就讀「不」；另一個係台灣譯法，叫做「鈽」（粵音：煲）。不過，睇嚟邱騰華兩個都唔識，不倫不類讀做「杯」。其實只要多啲留意新聞報道，冇理由唔知道「鈈」點讀，佢閂埋對耳唔接觸外界資訊，更令人懷疑佢對呢種令人望而生畏嘅元素，究竟有幾了解。