政情：平保新高管年輕有活力

平保經歷過○八年收購富通股權蝕到入肉後，當年嘅管理層相繼換班，董事長兼首席執行官馬明哲尋日就話，新一批接棒嘅管理層個個年輕有活力，勢令平保走得更遠更好。

近年平保嘅高管確係經歷巨變，集團前總經理兼執行董事張子欣，總經理職務已轉至任匯川身上，張子欣嘅執行董事身份，會喺股東大會之後，變成非執行董事。前首席保險業務執行官梁家駒亦退休享清福，輾轉由李源祥接棒。另外，前首席投資執行官約翰皮爾斯（John Peace）亦離咗職，依家投資重任主要交託副首席投資執行官陳德賢。

任匯川、陳德賢、李源祥、首席財務官姚波、總精算師張振堂，尋日分別出席港滬記者會。馬明哲話，除咗自己之外，呢五位高管，個個都好年輕，既有精算師，又有嚟自香港、新加坡等地嘅精英，又曾喺國際機構工作，而且只係四十歲左右，定可將平保帶到更高更遠。