政情：周一鑊淆底拒食日本菜

喺日本核輻射擴散嘅陰霾下，好多當地驗到有輻射污染嘅食材都禁止出口，本港日式食肆當然首當其衝，生意大跌，就算政府講幾多次日本進口食物安全都冇用。立法會飲食界議員、富貴黨「肥仔張」張宇人決定今日組團去食日本菜，以行動向日本同本港食物安檢投下信心一票，撐吓業界。

肥仔張話呢個諗法係由中總代表「IQ博士」黃宜弘尋日喺立法會食飯時突然提起，佢聽到覺得唔錯，即刻坐言起行，搵咗間做日本食品入口嘅批發兼零售商做試食點，順便等大家了解吓業界苦況。佢仲約埋唔同黨派嘅代表食飯，實行齊心撐日本菜。

業界自救回復公眾信心

雖然班議員好齊心，但係政府高官並唔撐喎，事關主理本港食品安全嘅食物及衞生局冇代表出席，肥仔張話搵過局長周一鑊，佢話唔得閒，唔使預佢，但就聲稱自己成日都有食日本嘢喎！

口講無憑，公眾點知周一鑊平日經常食日本嘢呀？老實講，既然市民對日本食物安全冇信心，但政府口口聲聲話進口嘅食品冇染到輻射物質，周一鑊早就應該諗到點樣令市民回復信心，依家班議員畀埋條橋佢，仲抬埋佢上轎，畀機會佢帶頭做嘢，佢本來已經係後知後覺，依家叫佢出嚟仲避而不見，咁咪即係話畀市民聽連佢都怕咗啲魚生同日本食材？

再講，周一鑊唔肯試食，咁副局長梁卓偉又忙乜呀？退而求其次，咁衞生署署長林秉恩又去咗邊呀？主事嘅官員竟然一條龍式唔去，試問市民仲點會信政府講嘢呀！

政府靠唔住，業界惟有靠自己，身兼立法會食物安全及環境衞生事務委員會主席嘅肥仔張仲籌劃緊，下禮拜去機場參觀本港嘅檢測進口食物過程，希望盡量提高透明度，回復公眾對進口食物嘅信心。