短打長擊：鬍鬚曾乾坤大挪移

調查發現，去年本港的社會和諧指數僅得五點三五分，創○六年開始調查以來的新低，多項有關政府施政的指數，包括問責精神及維持公平競爭等，都首次跌穿五分的合格水平。

鬍鬚曾理財無方，「史上最廢」預算案令他蒙羞！事實上，鬍鬚曾跪低派錢再派錢亦無助民望，依然唔合格，只能製造社會分化再分化！廢上加廢，真係情何以堪？政府有錢派都搞成咁，作為市民，你都咪話唔傷感！

鬍鬚曾派錢派到疑團重重、倒瀉籮蟹、雞毛鴨血，又好似弄亂了的毛線球，總之就係亂！亂！亂！鬍鬚曾畀人問到口啞啞，如今又急不及待在其網誌廢噏，義正詞嚴咁話，今次調整預算案引發一些爭議，當中不少地方都值得深思。他又強調無論是原先注資六千元入強積金戶口，還是後來變為向成年永久居民派錢，兩者理念一致，就是在財政許可的情況下，「藏富於民」！

鬍鬚曾除了面皮厚，更擅長自欺欺人。整份預算案不知所云，跪低轉軚求避過憲制危機，如今卻說成「我希望可以將今次預算案引發的爭議，轉化為正面力量，讓社會聚焦地討論一些重大的民生問題，而不是在政治鬥爭中糾纏打轉」。如此混淆視聽，一招「乾坤大挪移」，好似凡是反對佢份「史上最廢」預算案嘅人，都係漠視民生嘅罪人，都係「在政治鬥爭中糾纏打轉」！

鬍鬚曾無能、無誠、無信，卻面皮超厚，一味卸膊，香港社會和諧指數創新低，相信佢都有唔少「貢獻」！