最低工資紙老虎　指引含糊害勞工

公營部門作風官僚，效率奇低，不過，今非昔比嘞！點解太一叮咁講？唔信睇吓東區醫院，政府前日先至公布漏洞百出嘅《法定最低工資：僱主及僱員參考指引》之嘛，醫院嘅外判清潔商已經搶閘單方面更改僱傭合約，令最低工資形同虛設，員工加薪好夢成空，出手之快簡直令人嘆為觀止呀。叮！

最低工資五月一日實施，唔少僱主扭盡六壬鑽法律罅，其中一招撒手鐧叫「轉薪制」，好似武俠小說中嘅明教絕學乾坤大挪移咁，將薪酬計法轉嚟轉去，令人眼花繚亂。到埋單計數咯喎，嘻，就算引進最低工資，時薪加咗，但新制下嘅人工依然同舊制相差無幾，係咪神乎其技呢？係呀，而且呢啲仲係政府有份教路㗎。

風水佬呃你十年八年，政府靠害基層勞工，打針都無咁快見效。當局前日公布指引，為休息日同飯鐘問題留下一大片灰色地帶，話由勞資協商喎，被輿論炮轟變相教唆無良僱主鑽法律罅，迴避最低工資。嗱，果然不幸而言中，嗰頭公布指引，呢頭已經有醫院外判清潔工投訴被迫更改僱傭合約，爭拗焦點正正就係休息日同飯鐘問題！

講開又講，呢班外判清潔工都幾無奈，本來月薪六千蚊，若以每月三十日、每日九個鐘（連一小時飯鐘）計算，即時薪二十二蚊，實施最低工資二十八蚊後，有望加薪至七千五百六十元。但依家變時薪制，時薪調整為三十一蚊兩毫，但四天休息日報廢，飯鐘錢大條道理不計薪，埋單計數，人工變六千五百蚊上下，係就係多過以前少少，但距離最低工資嘅合理期望水平就差得遠咯，點會唔激氣吖！

公營部門帶頭掀起「轉薪制」風潮，示範點樣抗衡最低工資，點樣做無良僱主，認真諷刺！政府指引變身鼓勵僱主走法律罅嘅「法律天書」，更加豈有此理。基層打工仔有冤無路訴，紛紛鬧爆最低工資指引靠害打工仔，直斥港府將飯鐘同休息日問題模糊化，形同製造勞資矛盾，激化爭拗。

行政會議成員兼工聯會會長鄭耀棠呼籲僱主，唔好借勢扣減員工福利，否則應受譴責。其實，計太一叮話齋，最應該受譴責嘅，係勞工及福利局局長張建宗就真。

張建宗一向成事不足，敗事有餘，早年搞外傭稅搞出個大頭佛，近期推新版鼓勵就業交通津貼，又激發一場軒然大波，依家處理最低工資指引，又唔湯唔水，害人害物，佢根本就係縮骨卸膊，呢啲咁嘅公僕，真係應該早叮早着呀！