大學求發展，募集款項就係基本功，日前浸大收到張一億元嘅巨額捐贈支票，為今年嘅籌款大計打咗支強心針，校董會同大學高層幾乎全體出動，最難得嘅係浸大兩代校長齊齊撐場，見證難忘一刻。
浸大校長陳新滋心情好靚，仲同久違嘅前校長謝志偉寒暄。日本核災難仍然未解決，大家亦好自然講到核輻射塵可能襲港嘅事，謝志偉話，香港同日本相距三千公里，縱使有輻射塵粒飄嚟香港，分量亦相當輕微，唔足以構成殺傷力喎。
浸大獲孔憲紹慈善基金捐出一億港元，成立創意研究院，兩代校長謝志偉（左）同陳新滋（右）梗係撐場啦。
