政情：阿涂用唔着iPad 2新功能
iPad 2推出後，城中潮人又有新玩物，不過，好多人肯擲萬金都未必買到。白鴿黨立法會議員涂謹申一直用開iPad，尋日佢喺立法會出現時，手上攞住部iPad 2，惹嚟不少羨慕嘅目光。
阿涂話，其實係佢有朋友喺美國買多咗一部64GB、WiFi版白色iPad 2，問佢有冇興趣換機，阿涂見送到上門咪換機囉，佢都只係以原價大約五千五百蚊港幣買，絕冇炒賣成分。
用咗iPad 2幾日嘅阿涂，暫時只對個保護套讚不絕口，因為個套嘅設計非常方便。不過阿涂亦自爆，其實佢多數用iPad嚟睇電郵、上網、睇雜誌，所以用途同舊機分別唔大，iPad 2新增嘅影相拍片功能更唔係十分用得着。
咁樣似乎有啲浪費咗部iPad 2喎，不過阿涂能夠緊貼最新潮流，相信有助同年輕人溝通嘅﹗
iPad 2行貨下個月香港至有得買，阿涂已率先到手。