政情：搞搞政：雙面葉劉插鬍鬚曾亂派錢

財爺鬍鬚曾早前同建制派議員會面後，即刻宣布派錢六千蚊息民憤，當時唔少建制派走出嚟抽水，希望叨「成功爭取」光，好似新民黨主席葉劉淑儀就即時話「好歡迎財爺接納新民黨建議」，差在未叫好兼拍掌。不過，事隔兩個禮拜多啲，佢尋日掉轉槍頭批鬍鬚曾做壞規矩，呢啲叫人格分裂，定係政客有多個面譜呢？

葉劉尋日出席一個午餐會時，講到政府派錢六千蚊，佢就勁插鬍鬚曾派得唔乾脆，又話派錢令市民對政府多咗期望，到經濟轉差時都唔知點算，好唔負責任，即係話做咗壞嘅先例，第日點管治﹖

記者追問點解當初佢提議派錢？葉劉先呆一呆，之後解釋話覺得透過關愛基金派錢係不負責任，而唔係話政府派得唔啱。佢跟住又話，如果政府想增加公眾向心力，派錢就應該快狠準，最好兩個月內搞掂，又話可以學澳門咁，新移民派一半，就唔使有咁多紛爭。