政情：阿Ron掌港交所加酬金
通脹高企，投資有道同加人工都係對抗通脹嘅良方，港交所主席阿Ron夏佳理、行政總裁李小加真係唔使憂嘞，事關港交所下個月二十號開股東會，阿Ron同一班非執董都有人工加，分別加五萬元同三萬五千元，即係話阿Ron酬金每年為五十五萬元，每名非執董酬金每年為三十八萬五千元。
除咗開董事會會議外，港交所亦擬向部分委員會嘅主席同每名其他成員，分別支付酬金每年十萬元同七萬元，但董事每次出席該等委員會會議嘅酬金二千五百元則維持不變。咁多董事有好消息，又點漏得李小加嗰份呢？佢舊年收入都大豐收。