政情：民主阿婆就地試衫晒肉臂

退出政府多年嘅「民主阿婆」陳方安生一直不甘寂寞，忽然民主嘅佢，除咗月旦時事冇甩拖外，仲好鍾意恤髮、shopping，禮拜日就見佢喺置地廣場一間時裝店試衫，期間一度忘形得竟然連更衣室都懶得行入去，就地除咗件外套。

髮型一絲不苟嘅民主阿婆同囡囡陳慧玲一齊逛街shopping，兩人喺歐洲時裝名店Vica Moda揀衫。只見店員落力上前推介新裝，民主阿婆做顧客時就木無表情，再冇四萬咁口。揀咗十分鐘，民主阿婆忽然發現咗一件藍色花嘅外套，愈望愈鍾意，連更衣室都懶得行入去，二話不說就除咗件深灰色冷外套，喺舖頭裏面即場試身。呢一脫認真勇，事關當日天氣都幾凍，囡囡慧玲要着住件薄羽絨褸保暖，估唔到阿媽話脫就脫，露出一件白色背心，一雙「肉」臂同圓渾嘅腰身，更唔介意暴露於人前。

試完件藍色外套，民主阿婆意猶未盡，繼續喺店內左摷右摷，一時睇吓恤衫，一時試吓絲巾，揀足半粒鐘，一直都未有着番件外套。兩母女最後兩手空空離去，至於佢有冇吩咐店員改衫或者送貨，就唔知嘞。