政情：人民力量改口要有建設

年底就係區議會選舉，各大政黨都搶攻民意，由社民連分裂出嚟嘅人民力量都唔例外。係人都知，人民力量兩大旗手黃毓民、「大舊」陳偉業都係激進分子，鬧起人上嚟真係話之你，不過，就美孚新邨有發展商擬起屏風樓一事，人民力量就好理性，大舊尋日介紹方案時，更係各方兼顧，佢哋嗌出「人民力量唔係只識有破壞冇建設」，更加令人浮想連翩。唔通佢哋喺度寸緊近期話要瞓路軌反港鐵加價嘅社民連？

三輸變三贏？

人民力量建議政府主動以換地方式同發展商交換具爭議性嘅土地，以平息對方同地區居民嘅糾紛，例如以政府土地、喺勾地表撥出土地，又或允許發展商改變佢哋現行擁有農地嘅用途，仲話咁樣可以將現時嘅「三輸局面」扭為「三贏局面」。大舊聲言，上禮拜見完發展局局長林鄭月娥之後，對方認為有得諗喎。

佢哋又話，今次係佢哋正面政策嘅第一波，禮拜日會搞起動大會，人民力量將會對施政提出更多正面建議，強調佢哋唔係破壞力量，係建設力量喎。