政情：國際「千王之王」呃盡豬頭港官

西九文化區係本港文化藝術產業嘅地標之作，不過，行政總裁謝卓飛上任唔到半年就稱病劈炮，冇耐又喺英國另搵筍工，明跣香港人同香港政府之餘，仲狠狠摑咗西九管理局、尤其係主席兼政務司司長唐唐一巴。立法會聯合小組尋日開會，議員傾到謝卓飛嘅問題時，個個都好鬼㷫，議員憤言有人係「國際騙子」，要求政府追究到底「教訓佢」。其實，最應該追究點解政府同西九嘅豬頭高官、高層咁鬼蠢，搞到香港畀人搵笨兼成為笑柄，佢哋點把關㗎？

立法會監察西九小組委員會尋日討論件事時，議員嘅發言夠晒精彩，公文袋嘅陳淑莊形容香港「今次遇着千王之王」，建仔陳鑑林更以「國際騙子相當多」嚟形容；專業會議議員梁美芬更炮轟，謝卓飛「光天白日去英國上任，根本係擘大眼講大話」，質疑佢嘅醫生證明作假。

西九士氣受衝擊

啲議員你一言我一語，個個愈講愈㷫，要求當局追究到底，唔好就咁畀謝卓飛過關，誓要一雪西九之恥。啲議員咁多不滿，都係因為西九管理局遴選制度存在漏洞。唐唐尋日冇親身去解畫，由西九管理局薪酬委員會主席「單雞」單仲偕上陣，佢承認件事對西九嘅士氣有衝擊，該局亦已經吸取教訓。

不過，講到追究問題，單雞只係話希望謝卓飛能夠親自交代事件，又話謝嘅合約有半年離職後工作禁制期，家吓該局可以做嘅嘢已經唔多。咁講同唐唐之前所講嘅差唔多，即係畀人搵咗笨嘅豬頭除咗眼白白睇住人飽食遠颺，已經冇嘢好做。