大橋慘變掘頭路 香港前景也一樣

好嘢好嘢，港珠澳大橋有望喺二○一六年落成。港府話，大橋通車之後，接駁新建嘅屯門至赤鱲角連接路，以及屯門西繞道，可以打通香港經絡，騰出青嶼幹線等多條現有道路嘅容車量，強力支援物流業，同時提供另一條來往機場嘅陸上通道，鞏固香港作為國際及區域航空樞紐嘅地位。呢鋪真係想窮都難咯，大家鼓掌！

不過咁，官府講嘢，信半成好喇。冇錯，兩條新路可以提供往來新界西北同大嶼山嘅最直接路線，將深圳灣公路大橋、港深西部公路直接連繫機場、大嶼山同港珠澳大橋。問題係，兩條配套公路拖吓拖吓，分別要等到二○一八年同二○一九年至起好，唔可以同港珠澳大橋同步通車。因為咁，耗資幾百億元興建嘅大橋變成掘頭路，你話係咪吹脹呢，叮！

講到呢度，太一叮諗到一個好滑稽嘅情景。話說幾年後，一班貨車司機經港珠澳大橋嚟香港，忽然發現接駁公路仲未起好，焗住改用青嶼幹線，隨時逼到大塞車都有之！

唉，港府辦事不力，未見支援物流業，反而玩謝物流業。除咗道路工程老鼠拉龜，當局多年前提出興建第三條機場跑道，亦係議而不決，決而不行，拖到外國人都睇唔過眼。國際航空運輸協會發出警告，指香港機場將於明年飽和，再唔起第三條跑道，就會步倫敦後塵淪為次級航空樞紐。對比廣州機場規劃時已決定起五條跑道，到底邊個係未來珠三角嘅航空樞紐，唔使問阿貴都知啦。

講番港珠澳大橋，又係一匹布咁長。早喺一九八三年，已經有商界人士提出興建大橋，可惜港府無能，工程傾嚟傾去都傾唔掂數，最後要勞煩中央出手先至拍板興建，拖足三十三年至有望落成。

正所謂，三十年河東，三十年河西，港珠澳大橋拖足三十三年至起好，分別就大咯。三十三年前，內地改革開放啱啱起步，如果大橋及時起好，既可支援祖國發展，又可以將珠江西岸嘅貨物引向香港，令香港成為珠三角嘅物流中心。三十三年後，內地經濟蓬勃發展，上海已經取代香港成為全球最大貨櫃港，深圳港亦愈來愈旺，貨物再無必要取道香港，就算大橋起好亦難救物流業。

咦，一條好事多磨嘅大橋，配上兩條延誤落成嘅接駁公路，拖延再加拖延，無奈再添無奈，又確實配合得天衣無縫喎。

所以話，呢條掘頭路大橋充分反映港府施政特色！再咁落去，唔止港珠澳大橋變成掘頭路，成個香港卻步不前，任何發展都會走上掘頭路，叮！