SUN世代：網上旅人同下屬交心

打工仔都想有個開明上司，但現實往往是另一回事。黃澤禮就是一位難得一見的開明上司，他雖貴為網上旅行社高層，卻從不「敦起」上司款。「唔應該一味管住下屬點做，而係要聽意見，發揮下屬潛能。」這位好上司在公在私都對下屬照顧有加，「同事開心或唔開心，都可以同我分享。」公司業績屢創新高，足證他親民有理。

個子高大的黃澤禮（Charlie）是國際性網上旅行社Zuji香港區總經理，笑容可掬的他外形有點「㗎仔FEEL」，甫見面即跟記者大力握手，予人親切感覺。事實上，開明、開放正是他的管理風格：「我從來唔會因為係上司，就一定要同事聽話，只要將目標、方向解釋清楚，我會盡量畀同事發揮。」

屢創佳績證親民有理

新世代的上司毋須「敦起個款」，只要放下身段聆聽下屬意見，工作就更見效率。Charlie○七年加入公司，年半前由財務部經理晉升為總經理，他上任後特別定出「單對單傾偈」環節，「其實唔止傾公事，同事有私事亦可以分享，見到同事悶悶不樂，我都會主動問候，就算佢哋唔想講，起碼會欣賞呢份關心。」他深信打破同事間的隔膜，有利公司發展。

事實亦證明他親民有理。機票和酒店套票的銷售量不斷打破紀錄，正是團隊上下一心的成果。「我哋成日brainstorm，之前就諗到去街頭宣傳，即場叫途人入會，又搞送機票等噱頭，依家就有一個『千五蚊去得邊』嘅計劃，反應好好。」他開心地說。

以為Charlie是旅遊業界老手，不料他卻是「計數」出身。他在澳洲修讀金融及財經學，畢業回港後在畢馬威做了三年審計師，「每日做到夜晚十一、二點，返國內仲忙，起碼做到半夜兩、三點。」他最終吃不消，申請調往悉尼，這樣又過了三年。

憂女兒唔識中文返港

此時女朋友要到日本工作，他也跟着去東京，在廣告公司任財務總監，期間和女友拉埋天窗，誕下長女。「女兒一直交畀當地託兒所照顧，個女一歲幾開始學講嘢，竟然同我講日文，嗰刻我就諗：死喇，以後佢唔識講中文仲得了！」於是他偕妻女返港，加入現任公司。

由會計界跳入旅遊業界，他覺得兩者也有共通處：「finance要睇數，e-commerce一樣要根據數據去定出銷售方案。」他認為網上旅行社比傳統旅行社更有優勢，「例如有航空公司最近有promotion，我哋兩小時後已可放上網賣，傳統旅行社只會sell佢想sell嘅嘢，但客人上網有數以百萬計嘅package選擇，就算半夜兩、三點都買到！」

黃澤禮小檔案 Charlie's Profile

年齡‧36歲

學歷‧澳洲悉尼大學金融及財經系學士

現職‧Zuji香港區總經理

家庭‧已婚，育有一女一子

興趣‧旅行、打網球

放工放假必做‧陪伴太太和子女