政情：搞搞政：網選庸官 佳叔處臨界點

退出社民連嘅立法會議員黃毓民另起爐灶成立嘅人民力量，喺下周日聯同前綫、泛藍同選民力量等合作夥伴舉行起動大會。據悉，當日會大搞一個名為「不該！我最想佢下台大獎選舉」，畀出席嘅市民即場「公投」，選出佢哋認為最應下台謝罪嘅高官。

選民力量成員依家喺網上收集網友意見，睇吓邊位高官最應該「落車」走人，最後五強將自動進身起動大會當日嘅決賽。尋日睇過上榜嘅高官，「起錨」變「超錯」嘅煲呔曾、「唔鍾意食粟米斑塊飯」嘅財爺鬍鬚曾、「霸王硬上弓」迫令英皇書院縮班嘅教育局局長孫明揚、聲言「結婚唔使買樓」嘅運輸及房屋局局長鄭汝樺等通通上榜，但連向來作風低調嘅中央政策組首席顧問劉兆佳都上榜。

點解佳叔會上榜？好明顯係因為佢早前發表「臨界點」嘅言論，事後又出爾反爾而紅爆，唔少網友「點名力撐」要佢下台。睇嚟依家佳叔自己係處於「臨界點」就真。

依家庸官當道，且看下周日邊位高官跑出！