政情：棠哥唔肯講實嫻姐復出
前排做完頸椎手術出院後，工聯會會長鄭耀棠上個禮拜四首度「復出」出席公開活動，佢尋日出席另一公開活動時話身體已經好番好多，行路同上樓梯都冇乜問題，喺落樓梯就差少少；佢仲話已經去番開行會，終於唔使再告假嘞！
問起工聯會嘅選舉部署，棠哥繼續口密，點都唔肯答實工聯會票后陳婉嫻係唔係真係會復出，淨係話自己不斷有勸對方，依家只係等嫻姐點頭答應喎。唉，其實嫻姐復出已經係呼之欲出，幾成定局，睇嚟唔肯鬆口嘅其實係棠哥，唔係嫻姐噃！
身體OK、行動自如，棠哥又回復鬼馬本色，當畀人問到會唔會赤膊上陣參加超級區議會選舉時，佢即時話：「我從來冇話過自己會選，但又冇否認過會選，我依家都係咁答㗎咋。」講咗等於冇講。
嫻姐幾時復出，棠哥點都唔肯講。 （資料圖片）