政情：任志剛擺明唔再做公務
金融管理局前行政總裁任志剛一直退而不休，佢係中國金融學會執行副會長，又係建設銀行非執行董事，仲係中文大學工商管理學院名譽教授，非常活躍，但被問及會唔會再做公務，佢諗咗兩秒，跟住話「唔會喇」。
任志剛接受本港一間電子媒體訪問時話，自己對於金融財經一直都好有興趣，當國家同特區需要佢，佢都願意畀意見，但係佢會記住自己已經退咗落嚟，所以有意見都唔會公開提出。
被問到小市民「上車」買樓嘅問題，佢就話如果唔持有一層自住嘅樓係好不智嘅，至於投資買股票，佢就叫市民要不時做壓力測試，評估吓自己可以承受風險嘅能力。
