政情：黑英自爆患「上台亢奮」
英皇書院校友、天文台前台長「黑英」林超英，近期係咁追住政府要炒咗教育局局長孫明揚，但日前佢出席「傑出青年協會」年度會議時好似病貓咁，見到人就話自己有病，唔敢握手，話怕將啲病菌傳染畀人；上到台，仲自爆患有「不治之症」，嚇得台下嘅嘉賓都為佢擔心。
究竟黑英患咗乜嘢「不治之症」？原來佢患嘅係「上台亢奮症」。嗰日黑英患重感冒，抱恙出席傑青會議，喺台下時精神委頓，但上到台演講即生猛晒，講到冇時停。難怪佢都幽自己一默，話老婆笑佢患「上台亢奮症」，一上台就「口水多過茶」冇停口，「真係冇得醫。」
被問及點「招呼」限期已到仍唔肯落台嘅孫公？黑英打趣咁話：「做天文台嘅就點預測都冇用，因為變化無常，所以做乜都無用，雖然有planning，但到時自有良方處理啦！」黑英意思係「人算不如天算」呀！
黑英（中）自爆老婆笑佢患上「上台亢奮症」，一上台就口水多過茶。