政情：鬍鬚曾死雞撐飯蓋

雖然財爺鬍鬚曾喺月初「跪低」，為史上最廢嘅預算案補鑊，宣布人人派六千蚊嘅「派錢案」，但直至上周五出席立法會財務委員會特別會議時，佢依然講唔出點派同幾時派嗰六千蚊。佢尋日喺網誌度嗰六千蚊點派依然冇料到，跟住又呼籲班議員唔好因為政治爭議，令到預算案其他嘅建議落實唔到，影響民生。

講真，鬍鬚曾過往紀錄唔好，年年計錯數，預算案前又大玩狼來了嘅把戲，正所謂過咗海就係神仙，容乜易嗰六千蚊好似「八萬五」咁冇提就唔存在，班議員當然唔會咁易放行啦。

反鬧議員要求超出範圍

唔知係咪寫寫下，佢都諗到啲議員唔聽佢氹，所以佢又好似上周五喺立法會財委會特別會議上發晦氣冇飯食咁，倒轉頭鬧當日班議員提出嘅要求，例如設立全民退休保障，係超出預算案嘅範圍，仲話呢個問題要尋求社會共識，要理性溝通云云。跟住佢又話今年預算案嘅內容，其實已包含唔同黨派嘅要求，而呢種以政策理性平衡民意嘅做法，一直行之已久。

佢真係死不悔改，若果佢講嘅行之已久係真嘅，咁佢發表完嗰份史上最廢嘅預算案後，又使乜喺第七日就急急跪低，尤其要求設立全民退休保障又唔係突然間喺石頭爆出嚟，而係講咗好多年，好多團體N咁多次上街爭取㗎，佢喺發表預算案時特別講到建議注資六千蚊入強積金，就係回應市民呢個訴求，擺到明佢依家喺度死雞撐飯蓋。

網誌最後嗰幾句，佢話喺預算案過後，佢會總結今次經驗，好好改善下一次嘅安排，提升施政效果。咁就更加抵打，竟然將提升施政效果當做通過預算案嘅交換條件，一早就應該做，唔係等到以後，搞成咁係佢根本冇做好份工。