香港七國咁亂　遲早一拍兩散

有人話，睇到通街「盲搶鹽」，仲以為發生大災難嘅係香港唔係日本。其實搞出國際大笑話唔可以怪市民無知，港府施政無能，社會亂象叢生，港人除咗自保自救，仲可以做得乜？

叮，家陣香港烏煙瘴氣，確實亂過亂世佳人。有調查發現，舊年本港社會和諧指數創有調查以嚟新低。港府把口話構建和諧社會，其實不斷製造分化，令有錢人同基層市民、老闆同打工仔、新移民同永久居民之間矛盾愈來愈尖銳。

呢，最低工資仲有個幾月就正式實施，話就話幫基層打工仔，但法例漏洞多多，連指引亦欠奉，僱主無所適從，打工仔更唔知點保護自己嘅權益。譬如，法例並無指明休息日及用膳時間有薪定冇薪，搞到僱主同員工各說各話。勞資關係不但冇改善，反而進一步分化，變得更緊張，矛盾更深，簡直係添煩添亂。叮！

講到港府添煩添亂，最典型就係呢次「史上最廢」預算案嘞。當局罔顧民意、閉門造車，點起全城怒火，焗住自摑嘴巴，極速跪低認衰派錢，點知呢頭火未救熄，嗰頭又爆政治炸彈。

派錢派唔勻，新移民冇份，唔怪得怨聲載道啦。為咗補鑊，港府諗住借關愛基金過橋，由基金向低收入新移民派六千蚊，但又計劃引入嚴苛嘅入息審查制度，畀人狂炳玩「分化再分化」。

關愛基金尋日開小組會議，有成員一針見血，狠批港府喺預算案一次性派錢遺漏新移民，造成社會分化。咁又係吖，關愛基金成立目的係幫社福安全網嘅漏網之魚，協助低收入新移民應該由預算案處理，點可以推晒畀關愛基金㗎。

有社會福利團體罕有咁公開發表聲明，要求當局善用數千億元儲備，解決長期嘅社會福利問題，建立全民退休保障制度。係咯，港府欠帳太多仲要推卸責任，唔怪得財爺鬍鬚曾畀人叫「政治逃兵」喇。叮！

呢個跛腳鴨政府真係愈來愈九唔搭八，好似電影對白話齋，講又唔聽，聽又唔做，做又做錯，錯又唔認，認又唔改，改又改錯，總之一事無成，做乜都方寸大亂，進退失據，連北大人都睇唔過眼。

話時話，香港回歸咁耐衰咁耐，一年不如一年，令人懷疑問題究竟出喺港府管治能力有限，爛泥扶唔上壁吖，定係有人唔妥「一國兩制」，故意添煩添亂呢？好明顯，港人治港已經變咗餘孽治港，安定繁榮已經變成分化沉淪，計太一叮話齋，再係咁落去，唔使等五十年大限，一國兩制遲早變成一拍兩散。叮！