法例漏洞任人捐　最低工資聽捉蟲

涸轍之鮒嘅故事大家聽得多，其實呢句成語仲有一個外篇。話說涸轍之鮒終於等到一位好心人，決定用網將佢撈入水缸，殊不知，個網穿咗個大窿，條魚由高處跌落地下，噗一聲，死咗。

救魚係咁，救人亦係同樣嘅道理。港府推行法定最低工資，本來係為咗打救低收入打工仔，可惜新例仲未實施，已經畀僱主聯合會搵到漏洞，佢哋喺報章刊登廣告，指法例冇規定休息日及用膳時間有糧出，提醒僱主喺五月一日最低工資實施前「採取適當行動」。換言之，即係公開教僱主鑽法律罅，更改合約扣假扣飯鐘囉。

見到咁，勞工團體好谷氣，批評僱主聯合會係「無良僱主學堂」，教唆僱主剝削員工福利。但勞工處就闊佬懶理，淨係叫勞資雙方好好溝通，自己傾掂數喎。大家都知啦，今時今日基層勞工供過於求，打工仔根本冇乜叫價力，如果佢哋真係有能力迫使僱主改善待遇，仲使鬼你制訂最低工資咩，叮！

講番扣飯鐘呢家嘢，其實唔係僱主聯合會首創。早前大家樂扣飯鐘事件激起民憤，輿論嘈到拆天，但港府唔止冇出手制止，甚至話明飯鐘唔係工作時間。多得當局「指點迷津」，僱主自然心領神會，家陣唔止扣飯鐘，隨時連假期都冇錢。太一叮思疑，最低工資實施後，香港可能出現一種名為「工時精算錶」嘅新發明，事關嚴格來講，唔止放假食飯唔算工作，員工返工時打電話、上洗手間甚至伸個懶腰都唔係工作，無良僱主話唔定時時刻刻攞住個錶，準確計算僱員嘅「實用工時」。

正所謂，你有張良計，我有過牆梯。尤其最低工資法例漏洞多多，僱主求其搵個窿就可以掂行掂過當佢冇到，呢，網上有人發表「最低工資攻略」，除咗扣假扣飯鐘，僱主仲可以要求員工改自僱、免費幫手開舖等等。而最最最重要嘅係，對於呢啲取巧行為，政府一係束手無策，一係視而不見。早前咋嘛，本報揭發食環署轄下一間外判清潔商訂立幾十項「奴工條款」，將懶散、傾偈、食嘢、睇報紙等列為「不當行為」，每次罰款六百幾至三千七百幾元不等，扣扣埋埋，隨時成份糧冇晒，而食環署居然當睇唔到喎。

法例漏洞任人捐，最低工資聽捉蟲。要怪就怪港府無能，花咗咁長時間制訂最低工資法例，最後居然搞到漏洞百出，直頭係食塞米啦，叮！