政情：陳幼南潮玩潮語App
海外潮人企業家協會前晚喺會展舉行就職典禮，見到潮州商會會長陳幼南、副會長胡劍江同青年委員會副主任林月萍齊齊耷低頭玩iPod。玩乜咁投入？原來佢哋玩緊嘅係IT公司幫商會研究開發嘅自學潮州語App。
陳幼南話商會同好多教育機構定期合辦潮語學習班，反應亦都相當之好，但為咗想照顧一啲工作繁忙未能抽空報讀潮語人士，早前想到呢個教學方法。佢話呢個App用真人發聲讀出潮語發音，等啲人可以跟住嚟聽同埋講。
胡劍江補充話，依家等軟件完成咗最後測試之後，就可以喺iPhone同iPad下載嘞。學識點講潮州話，就個個都可以做「架己冷」喇！
胡劍江（左起）、陳幼南同林月萍話有呢個潮語軟件，學習方便好多。
