政情：搞搞政：立會3D動畫遏暴力？

掟蕉、掃枱、撒奶粉，議會內外嘅激進示威行動無日無之。專業會議（4P）喺月初訪問咗六百幾名市民，八成幾人唔同意過激行為，七成五要求收緊《議事規則》。4P話民意好清楚，唔想嚴肅嘅議事文化繼續被破壞，計劃喺月底召開嘅議事規則委員會上提出收緊規管，包括賦權各個委員會主席有權趕違規議員走，又或重罰嗰啲屢勸不改嘅議員，例如因應違規程度禁止佢哋出席會議嘅時間，甚至扣嚴重違規嘅議員人工。

劉秀成仲希望將來全面禁止議員帶展示品入會議廳，事關新大樓嘅硬件科技大幅提升，有乜嘢要展示都可以通過中央螢幕展出，到時會更清晰更多人睇到，唔使議員邊講邊拎，亦免卻某啲人講講吓就掟嘢嘅問題，一石二鳥。佢話議員應該畀啲想像力，要掟嘢就製作動畫去做，例如3D咁，咪好似現場一樣，又可以掟得多樣化啲添！

佢嘅戰友梁美芬就覺得如果有人有心搞事，無論如何都杜絕唔到，就算冇展品喺會議廳，都可以掟手袋同掟高跟鞋喎！