政情：林公公唔敢再請政助
政府依家仲有啲政治助理嘅空缺，距離呢屆政府任期仲有年幾時間，但政府仲預留咗筆錢請政助喎！
白鴿黨嘅「高達」李永達尋日喺立法會財務委員會特別會議上，就追問政府點解咁做？政制及內地事務局局長「林公公」林瑞麟回應話，今屆政府得番十幾個月任期，搵到人選嘅機會愈來愈低。林公公咁講，即係暗示未必請到人做。
老實講，擴大政治問責制請番嚟嗰隊「八國聯軍」副局長同政治助理，上場兩年多以嚟冇做過場好戲，但就醜態百出，工作表現劣評如潮，個個變晒負資產，好多立法會議員都話要炒晒佢哋，林公公仲敢請人咩！就算佢敢請，啲人都怕畀呢個衰到貼地嘅政府拖累，避之則吉啦！