政情：四叔增持恒地收息10億

每年喺恒地公布業績後，主席「四叔」李兆基例牌會增持公司股份，尋日睇聯交所嘅網，果然睇到四叔用咗大約兩億八千萬元增持恒地，唔怪之得恒地個價呢兩日咁堅挺啦。

恒地上星期四出業績，四叔就响星期五（十八日），以平均每股47.055元，增持595.2萬股，持股量由65.35%增加到65.62%，四叔第二日就增持，新買嗰批股份仲趕得切收息添，恒地派末期息七毫子，淨係呢批股份就可以收416.64萬元。四叔最新揸住14.279億股恒地，可收末期息就接近十億元，依然係收息之王！

恒地大公關Bonnie話四叔真係好錫公司㗎，如果好價相信會繼續買添。佢又爆咗四叔一個秘密，話說舊年恒地業績報告入面，四叔寫嘅主席報告，喺國際ARC年報大獎中獲獎，讚佢資料詳盡又透明度高，所以今年四叔加倍努力，約齊各部門開幾次大會，然後親自操刀寫成，足料有成三十頁紙。