政情：黑英追殺孫公「海嘯」警告煲呔曾

傳統名校官中英皇書院被教育局迫令減班鬧得滿城風雨，英皇校友兼天文台前台長「黑英」林超英，直斥教育局唔容許英皇學校管理委員會投票表決，就單方面決定英皇減班係違反學校管理章程，亦反映教育局局長孫明揚誠信有問題、偏離法制同漠視民意，強烈要求孫公落台。不經不覺等咗兩個星期都未有回音，黑英尋日向煲呔曾發「最後通牒」。

黑英尋日喺網誌向煲呔曾發出公開信，質疑呢兩個星期以嚟，孫公對指控保持緘默，即係代表乜嘢呢？係事實俱在，無話可說，默然承認？佢更質問煲呔曾：「連當事人 （孫公）都不否認，請問閣下還在等甚麼？」

淪政府負資產添煩添亂

佢又引用港大民意調查結果，指孫公已變成特區政府嘅「負資產」，為特區政府增添煩亂，如果孫公繼續在位，係對其他用心盡力同勤政愛民嘅局長不敬，甚至係侮辱。佢仲話，「水能載舟，亦能覆舟」，希望煲呔曾「當機立斷，報請中央人民政府，撤銷孫明揚先生的局長職務，既挽回特區政府的誠信，也展示你的強政勵治」，仲提醒煲呔曾要慎思，不要讓海浪變成海嘯，仲叫煲呔曾火速回覆。

大家都見到日本海嘯幾咁恐怖。黑英嗰句「不要讓海浪變成海嘯」擺明係警告煲呔曾，若果再攬住孫公嘅話，將會引發海嘯式怒潮，到時連佢在內嘅政府都會「覆舟」，即係冧檔。

英皇書院校管會校友代表鄭文容亦話，依家啲校友正諮詢法律意見，同埋要求教育局澄清官校喺政策決定過程嘅既定程序。但政府回應話自願減班計劃係政府倡議嘅全港政策，教育局是政策嘅推行者，亦是官校嘅辦學團體，因此官校應按校管會章程辦事，當中並不存在校管會是否須就參與計劃進行表決。

「海嘯」逼近，但政府仍然無動於衷，反映煲呔曾政府死性不改，永遠都後知後覺，唔知個死字點寫。