快快摺埋平機會　慳番公帑濟窮人

平機會每年攞幾千萬元公帑資助，咁大筆錢用咗去邊？立法會議員劉慧卿就平機會處理個案成本效益提出質詢，講都冇人信，原來平機會舊年申領近八千萬元資助，處理投訴只有八百幾宗，成功調解個案只有六成，多年來未能調解嘅個案累計接近一千五百宗。

仲有呀，平機會○九及一○年提交畀法院審理嘅個案有十六宗，公帑使咗近百萬，除咗四宗未審完之外，只有一宗勝訴，其他唔係敗訴、和解就係撤回，你話係咪將公帑揼落鹹水海吖？叮！

話到尾，納稅人焗住做冤大頭，係因為平機會成日正經嘢唔做，淨係識無理取鬧，係又告唔係又告，甚至玩選擇性針對。呢，東方報業集團就曾經深受滋擾及濫告。其中一宗，平機會冇核實投訴內容就亂咁嚟，發信要求並無涉及殘疾中傷嘅《太陽報》進行調解，後來至發現自己擺咗大烏龍，涉事嘅係另一報章。

另一宗提交法庭審理嘅個案，東方雖然勝訴，卻要賠上約一百四十萬元律師費，平機會亦因此用咗超過五十一萬元公帑。

正如立法會議員張國柱話齋，平機會應該檢討事前把關工作，如果事先深入了解來龍去脈，就唔會胡亂將個案交法庭審理。執業大律師龔靜儀亦直指投訴嘅準則需要檢討，「前期篩選工作馬虎，最終輸到盡嘅係平機會」。

城市大學專業進修學院學術統籌宋立功講得啱，平機會調解唔到就告上法庭，而且勝訴率奇低，係浪費公帑，「不如將啲錢去幫弱勢社群同長期病患者，仲有效益」，果然係一針見血。

專家真知灼見港府聽到未？講真，呢啲冤枉錢使番落有需要嘅市民身上，大把嘢可以做。嗱，就以每單官司花費五十一萬計算吖，雖然對平機會呢個大花筒只係零頭，但已經等於一個綜援四人家庭三年嘅標準津貼。如果用喺社會福利項目，足夠四千幾位基層市民一個禮拜嘅食物援助，或者可以資助五千六百幾位長者補牙。

天下本無事，小人偏擾之。平機會無所事事，除咗化公為私醜聞不斷，浪費公帑更加當食生菜。小人不除，永無寧日。計太一叮話齋，不如化害為利，摺埋平機會，慳番呢一大筆公帑接濟窮人好過啦。叮！