政情:余錦基鬧港人嘥電
尋日喺馬場撞到足總董事余錦基，講起日本核輻射污染唔少農產品，佢都話好關注，雖然未發現日本魚生受污染，但為咗健康着想，佢都話暫時少食嘞！
講到日本核危機，佢話核電都有好多好處，唔單止高效能，又乾淨，而大亞灣核電廠亦比日本嘅先進好多，所以唔使擔心。之不過，佢就覺得香港人唔夠慳電，好似天氣凍，但好多食肆仍然冷氣大放送，搞到食客要着到好厚嘅衫先頂得順；又例如有啲食肆二十四小時都開住燈，咁就嘥好多電啦！
前幾年，本來係「動感之都」嘅香港至畀人嘲為「凍感之都」，嘥晒啲電，按余錦基咁講，似乎依家都冇乜改善喎！
