政情:周一鑊寸嘴 顯政府無知

早幾日因日本核危機升級而刮起「盲搶鹽」，主理事件嘅食物及衞生局局長周一鑊雖然即時出嚟澄清，叫市民毋須搶購，但卻極輕佻咁話，相信中小學生都知道食鹽無助抗輻射，擺明車馬寸爆班搶買鹽嘅市民冇常識，隨即畀市民鬧爆，連醫學會會長蔡堅都睇唔過眼，鬧埋一份。

蔡堅尋日話，香港唔係好多人熟悉核子醫學，唔少醫生都要查過先知係乜嘢一回事，更何況係普通市民大眾？仲話教育市民係政府嘅責任，如果佢哋冇喺核教育方面多花工夫，周一鑊咁輕佻嘲笑市民無知，唔單止唔恰當，仲正正反映政府嘅無知喎。蔡堅擺明係鬧周一鑊寸嘴啦！

佢認為政府應該清楚話畀市民知面對輻射時應該點應對、全港十四萬粒碘片應該點發放同市民嘅走難途徑等，呢啲全部都係政府應該做嘅基本功。佢仲直言，如果政府唔肯負起呢個責任落場做嘢，醫學會唔會坐視不理，佢將聯同其他團體繼續教育市民。