政情:社總搬新竇發債券籌款
社會工作者總工會尋日為新總部舉行開幕儀式，會長兼立法會社福界議員張國柱話新總部去年六月成交，當時商業大廈仲未被炒起，諗番起都覺得好彩喎。
社總新總部建築面積一千三百呎，聽落好似唔係好大，但原來比舊總部大咗差唔多一倍。張國柱話要搞獨立工會運動，有自己資產最緊要，所以點都要有個總部揸手咁話。新總部成交價三百三十萬元，即使賣咗舊總部，仍欠幾十萬元，為咗籌錢，佢哋向會員發行債券，東拼西湊終於夠錢搬新竇。
雖然依家有新總部用，但之後幾年仍然要不斷籌錢還債，即係做房奴，所以佢呼籲啲會員將政府額外派或者退稅嗰六千蚊拎出嚟畀工會喎。