政情:任志強卸任華遠執教鞭
曾經連續N年穩奪內地上市房企年薪最高老闆嘅華遠集團董事長任志強，日前喺自己嘅微博透露「即將卸任嘞」。咁大家以後咪好難再聽到佢發表高見？又唔係噃，事關佢答應咗做北京師範大學嘅客座教授，相信佢仲會成日喺公開場合蒲頭嘅。
以言論大膽見稱嘅任志強外號「任大炮」，係內地房地產界最受爭議嘅人物之一。雖然佢為國有獨資嘅華遠集團効力，但作風似民企老闆多啲。佢喺微博透露，「組織」已經開始考察新班子，佢好快就會卸任集團董事長一職。係咪連上市公司華遠地產都退出呢？佢就話「等緊消息」。
舊年上海交大、復旦、浙江大學等院校都想請佢做客座教授，佢當時話有公職在身唔敢妄想，但既然上面已經搵人頂替佢嘞，所以就應承咗北京師大。嗱！呢啲都係著名高級學府，你又點會估到原來任大炮最想喺退休之後搞幼稚園呢？
任志強退休之後最想搞幼稚園，真係估佢唔到。 （資料圖片）