政情:鬍鬚曾厚顏反思得把口

經過上個禮拜喺網誌反思預算案後，財爺鬍鬚曾尋日又喺網誌話本來想再講吓反思嘅嘢，但遇到日本發生地震，所以轉話題。佢話今次天災造成市場波動，有人規避風險，亦有人相信別人恐懼時我貪婪嘅相反理論，政府最重要嘅工作係適時發布準確嘅訊息。

佢跟住提到近日有啲不良分子利用今次天災，編造謠言以製造市場同社會恐慌，致發生搶鹽事件，仲話要譴責呢啲劣行添！睇到呢度，大家可能會覺得好可笑，事關鬍鬚曾年年計錯數，明明庫房水浸，但次次都壓低市民對預算案派糖嘅期望，畀市民鬧爆扶貧不力，試問佢幾時有適時發布準確訊息畀市民知？咪一樣係講大話發放錯誤訊息！係咪都要譴責佢呢？

失業潮殺到 冇危機意識

樓價高企，再加上通脹狂飆，市民生活愈見艱難，但鬍鬚曾視而不見，上個月發表嗰份被嘲為史上最廢嘅預算案，仲話要投資未來，但係佢根本就想繼續做好守財奴份工，搞到天怒人怨，七日後隨即跪低發表派錢方案，話人人派六千蚊，連凡周日寫嘅網誌亦停咗兩個禮拜。

再講吖，日本地震連帶食材短缺，必定再推高通脹，尋日已有工會走出嚟發出警告，話相關食肆受影響，可能造成幾千人失業，呢啲都係日本地震帶嚟嘅連鎖問題，鬍鬚曾喺網誌卻隻字不提，再次顯示佢冇危機意識。

上個禮拜復筆喺網誌話對預算案反思，睇完尋日佢寫嘅嘢，好明顯佢得把口講反思，仲喺度有口話人冇口話自己。究竟佢幾時先會反思？唔通要雷公劈先至醒？