諮詢爛騷冇下文　包庇淫媒禍香江

開講有話，做戲做全套。不過咁，對於出咗名議而不決、決而不行嘅港府嚟講，就算做戲都係有頭冇尾，真搞笑！

話說港府○八年底敲鑼打鼓，就檢討《淫褻及不雅物品管制條例》展開諮詢，第一階段諮詢早就結束，原定兩年前進行第二階段諮詢，內容包括「淫褻」及「不雅」嘅定義、審裁處嘅運作同互聯網及新媒體嘅處理等。點知拖到依家仲係無影無蹤，所謂諮詢變咗杳無音訊。立法會議員劉慧卿忍唔住向商務及經濟發展局提出質詢，點知該局居然話，仲要就檢討條例嘅下一步工作進行詳細研究喎，至於仲要研究到幾時，幾時先至可以進行第二階段諮詢，大家都唔知。

叮！檢討一條法例，前後搞咗三年，依家仲話要繼續研究，擺明係敷衍及愚弄市民喇，簡直豈有此理。計太一叮話齋，當局不如索性宣布收檔罷啦，橫掂政策爛尾已經係家常便飯，唔使面紅喎。

研究復研究，諮詢無了期，盲嘅都睇得出港府係別有用心喇。正如議員質疑，當局刻意拖延，等諮詢不了了之，任由無良傳媒荼毒青少年，直頭係不負責任。亦有議員直斥當局冇膽，無了期咁拖延，只不過係想將燙手山芋留畀下屆政府。而淫審處審裁員龔靜儀更一語中的，近期網上資訊屢被揭發渲染色情，拖延諮詢，令監管困難，港府簡直係將青少年置於淫媒虎口，置諸不理。

話時話，立法會議員今次拍案而起，可以講係擊中要害，但作為民意代表，應該繼續窮追猛打，主持公道。大家都知道，淫審處不嬲都係親疏有別，執法不公，一方面打壓正義傳媒，另一方面包庇淫賤傳媒，先至搞到香港烏煙瘴氣，亂七八糟，所以，要檢討淫褻條例，首先就要整頓淫審處。

提起淫審處，唔止笑話多，醜聞更加多。世界藝術珍品「大衞像」當不雅，希臘《愛情神話》當色情，簡直笑死人。而最離譜嘅係，《東方日報》及《太陽報》刊登外國女星Kelly Brook照片，被評為二級不雅，爛果報刊登同一輯照片就變成一級非不雅，而香港有售嘅外國雜誌《NOW》無遮無掩刊登相同照片，甚至連送檢都慳番添。淫審處唔止雙重標準，直頭係三重標準，「告一間唔告一間」，如果話佢哋唔係玩針對，你信唔信吖？好明顯，淫審處已經淪為港府打壓異己嘅政治工具，唔怪得諮詢一拖再拖，講到尾，當局根本唔係真正要檢討。

講開又講，淫審處過去幾年處理個案數目好似過山車咁，時多時少，多嘅四萬幾宗，少嘅得一萬幾宗，但奇怪嘅係年年開支都差唔多，一年處理一萬幾宗同一年處理四萬幾宗，都係要使咁多錢，究竟呢啲錢使咗去邊，睇嚟審計署有必要查一查。

多隻香爐多隻鬼，反正淫審處已經病入膏肓，再做檢討騷都無謂，不如索性摺埋佢，慳番啲公帑好過啦。叮！