政情:食力簡輕鬆現身馬場
有「食力簡」之稱嘅五屆香港冠軍練馬師簡炳墀，大前日畀廉署拘捕後，當日深夜已獲准保釋離開，休息一晚後，尋日朝早見佢精神奕奕咁去參加沙田馬場舉行嘅「2011香港國際馬匹拍賣會」。佢笑笑口咁話自己食得落、瞓得着，一派輕鬆，招積如故。
食力簡戴住頂紳士帽同太陽眼鏡，喺朝早十時半抵達馬場，二十分鐘後，就拎埋把遮準備離開。問佢點解咁早就走，佢話已經睇過晒啲馬匹，亦吩咐咗徒弟應該點做，所以唔使睇足全場喎！對於被廉署請飲咖啡一事，食力簡一派輕鬆咁話：「我乜嘢都見過晒啦！」咁覺唔覺得被人出賣咗呢？佢話︰「多多少少啦，我好平常，好平靜。」
食力簡前晚喺廉署獲保釋，尋日朝早精神奕奕咁出席沙田馬場國際馬匹拍賣會。