政情:傻強收埋最多機密

官方機密一向畀人好神秘嘅感覺，咁多個政府部門中，邊個最多機密？講你都唔信，如以過去四年嘅統計，財經及庫務局局長陳家強成為最多機密嘅局長，佢送畀政府檔案處嘅四百一十幾份資料中，只有兩份唔係機密嘅，其他嗰啲全部都要鎖夾萬加鐵鏈，保安十足。

究竟傻強有啲咩不可告人嘅秘密呢？根據政府回覆立法會議員嘅質詢，佢個局比較敏感嘅議題係金融安全，涉及嘅資料有聯匯、外匯基金投資調動等，傻強吞咗咁多秘密落肚，真係好辛苦噃。

除咗佢之外，另一個機密較多嘅部門就係社會福利署，佢哋有六百三十八份機密檔案，雖然佔社署送去政府檔案處共二萬幾份資料嘅份額唔算好大，但已經好驚人。以社署嘅工作範圍，呢啲機密資料斷估唔會同綜援或生果金申請個案有關，佢哋嘅機密真係幾耐人尋味。到最後大家可能會問保安局、警務處或者入境處呢啲咁多入境黑名單、臥底名單等機密檔案嘅部門又有幾多機密呢？原來佢哋交畀政府檔案處嘅資料好少，保安局同入境處更係一份都冇。