政情:胡曉明傳授見工秘笈
失業率下降，人力市場亦相對好景，尋日有團體舉辦招聘活動，協助青少年踏上工途，菱電集團主席胡曉明都有現身，貴為老闆嘅佢見過唔少嚟搵工嘅人，佢亦同青少年分享見工嘅經驗。
應顯示出有視野
胡老闆提醒求職者要見工前，最好上網做定功課，最少都要了解吓應徵公司嘅背景，咁樣去見工時都有多啲資訊交流，亦唔使咁被動。佢仲話，見工時應該畀對方覺得你有視野、有眼光，千祈唔好畀人以為你只係為打工同出糧，咁樣肯定冇運行。
一句講晒，佢覺得年輕人投身職場時應該充滿理想同活力，做定功課先上陣，畢竟機會係留畀有準備嘅人㗎嘛。
