政情:唐唐擦年輕人鞋補鑊
政情高官經常衰多口、亂噏嘢，政務司司長唐唐早前向80後年輕人大噴「車毀人亡」嘅言論，結果搞到自己民望插水，仲畀政圈鬧餐死，引為笑談。尋日唐唐出席一個活動時，竟然一改態度，簡直對年輕人前倨後恭，仲讚到香港嘅年輕人天上有、地下無，其實明眼人都知佢唔係讚後生仔，只係想救自己啫，遲唔遲啲呀？
唐唐尋日獲邀出席國際扶輪地區年會發表演說，劈頭佢就落足鞋油大擦年輕人鞋，話青年人對社會好重要，政府亦有責任聆聽年輕人嘅訴求，滿足新一代嘅需要，畀佢哋有機會學習知識同技能，相信咁可以令到成個世界更加美好。嘩？佢冇耐前至鬧80後「閂埋門做皇帝」噃？變臉大師都要跟佢學嘢。
睇番在座嘅人，大部分都已人到中年甚至老年，80後、90後真係唔多，唐唐不惜騎劫大會去氹年輕人，擺明係補鑊啫。